Sobre Proameixa:

Proameixa é unha empresa dedicada ao cultivo de moluscos bivalvos que leva a cabo a súa actividade na ría de Arousa e foi pioneira no cultivo en suspensión de semente de ameixa empregando bateas. Dende 2005, os fundadores desta compañía familiar, grazas á súa vida dedicada ao mar, crearon ferramentas e formas de traballar que lles permitiron optimizar os diferentes aspectos do proceso. Todos os seus coñecementos e paixón pola acuicultura posibilitáronlles partir dende cero e chegar a consolidarse no sector, sendo a empresa de referencia no cultivo de semente de ameixa en Galicia.

En que consiste o traballo de Proameixa?

O traballo que leva a cabo Proameixa comeza coa selección dos reprodutores buscando como resultado unha semente resistente e de calidade. Estes reprodutores son enviados aos mellores criadeiros, nos que se inducen as postas e se leva a cabo o cultivo larvario. Tras alcanzar 1,5-2 mm, as sementes son cultivadas nas bateas repartidas en estruturas como gaiolas e lanternas (un conxunto de bandexas rodeadas por rede tubular, que foi deseñado por Proameixa) ata alcanzar o tamaño óptimo de sementeira. Finalmente, as ameixas seméntanse en parques de cultivo e bancos marisqueiros ata alcanzar o tamaño comercial e con interese de repoboar o medio natural.

Cal é a vantaxe do produto co que traballa Proameixa?

Comprobaron, ao comezo da súa actividade, que a ameixa que se sementaba nos parques procedía directamente dos criadeiros cunha talla inferior a 7 mm, a cal tiña unha supervivencia de aproximadamente o 50%. Ao ver estes resultados, Proameixa decidiu apostar por levar o cultivo ata alcanzar de entre 15 a 20 mm. Esta talla posibilita unha supervivencia en torno ao 95% debido a que un maior tamaño permítelle á ameixa enterrarse mellor no substrato e defenderse dos distintos depredadores existentes na súa contorna e das condicións meteorolóxicas adversas. Sementar nesta talla tamén ten como beneficio un menor tempo de crecemento nos parques.

Expectativas de futuro:

Durante a súa traxectoria, Proameixa sempre tivo como obxectivo ir crecendo con proxectos innovadores co fin de mellorar e ofrecer a mellor calidade posible en todos os aspectos. Actualmente, como expectativas de futuro atópase seguir mellorando o cultivo de semente de ameixa, ademais doutras especies.